Nyabihu:Gukererwa byatumye umwarimu akubitirwa mu kigo ashungerewe nabo yigisha
Umwarimu witwa Niyonteze Corneille arashinja Umuyobozi w’Urwunge rw’amashuri rwa Gatagara ruherereye mu mudugudu wa Bicyereri mu kagari ka Gatagara mu murenge wa Jomba mu karere ka Nyabihu kumukubitira mu ruhame rw’abanyeshuri.
Ibi byabaye ejo hashize tariki 7 Gicurasi 2026 mu masaha ya saa 7h 55 z’igitondo ubwo abarimu n’abanyeshuri baba bacyereye kuza ku ishuri bamwe baje kwiga ,abandi baje kwigisha.
Uyu mwarimu avuga ko yakubiswe biturutse ko yabwirwaga ko yacyererewe ibyabereye mu biro by’umuyobozi w’ikigo hari abandi barimu batanu babibonye.
Uyu mwarimu avuga ko ubwo yageraga ku kigo yahageze I saa 7h55,ubusanzwe isaha yo kuhagera ikaba ari 7h45,iyo zigeze bahita Baca umurongo mu ikaye y’ubwitabire.
Ahageze yasanze uwo babaye bagize ushinzwe amasomo witwa Anastase Nzahorerwanima[kuko ushizwe amasomo bataramuhabwa]amubwira ko abakererewe bose bajya mu biro bya Diregiteri kuvugana nawe.
Niyonteze Corneille ati:”najyanye na bagenzi banjye batanu tugeze imbere ya Directeur w’iki kigo atubaza impamvu twacyererewe tugaragaza impamvu y’imvura yazindutse igwa bityo ko bitaturutse ku bushake bwacu,maze dusabwa kuzana ibidanago(Documents pédagogiques) byacu .”
Niyonteze Corneille abaza umuyobozi niba kuzana ibyo bidanago bifite aho bihuriye no gucyererwa dore ko byifashishwa mu kugenzura imyigire n’imyigishirize,Umuyobozi yamubwiye ko yamukubita,undi amubwira ko ataba aribyo,nibwo yamwadukiriye arakubita inshyi mu matama bagenzi be bareba.
Nyuma ku busabe bwa Directeur Bwana Manirakiza Innocent yasabye ushinzwe amasomo Anastase Nzahorerwanimana guterura Niyonteze Corneille bajugunya hanze ku mbuga y’ishuri abarimu n’abanyeshuri barebera.
Twashatse kumenya icyo Umuyobozi w’iki kigo Cya GS Gatagara Bwana Innocent Manirakiza avuga kuri iki kibazo,inshuro icumi twahamagaye telefoni ye ntiyacagamo.
Umuyobozi w’akarere ka Nyabihu Madame Mukandayisenga Antoinette yabwiye Kivupost ko kugeza ubu bataramenya iby’iki kibazo gusa ko bagiye kugikurikirana.
Ibaruwa dufitiye kopi igaragaza ko kuri ubu Niyonteze yamaze gutanga ikirego mu Rwego rw’Ubugenzacyaha RIB Station ya Jomba,kugirango hatangire iperereza ku cyatumye akubitirwa imbere y’abarimu n’abanyeshuri.
