Rusizi:Mu Gatandara ahokerezwaga imibiri y’Abatutsi muri Jenoside yakorewe Abatutsi hagiye gushyirwa ikimenyetso kibumbatiye amateka yaho

Mu kiganiro ubuyobozi bw’akarere ka Rusizi bwagiranye n’itangazamakuru kuri uyu wa Gatanu tariki ya 3 Mata 2026,hagarutswe ku mateka y’agace kitwa “Gatandara” gaherere mu murenge wa Mururu ,agace gafite amateka adasanzwe ya Jenoside Yakorewe Abatutsi mu w’1994.

Amateka agaragaza ko muri aka gace mu gihe cya Jenoside yakorewe Abatutsi mu w’1994 ,hari inzu y’umuturage (nanubu iracyahari) yarifitemo icyocyezo cyotsaga imibiri y’abatutsi bicwaga mu gihe cya Jenoside.

Amateka agaragaza ko muri kariya gace hari bariyeri yicirwagaho abatutsi bavuye impande n’impande ,maze abatutsi bahiciwe bakaribwa.

Ni muri Uru rwego akarere ka Rusizi n’inzego zitandukanye bafashe umwanzuro wo kuhasyira ikimenyetso n’ubusitani buzagaragaza neza ayo mateka.

Umuyobozi w’Akarere ka Rusizi Bwana Sindayiheba Phanuel yabwiye itangazamakuru ko muri Kariya gace hagiye gushyirwa ikimenyetso kibumbatiye kandi kinagaragaza amateka yaho.

Ati:”Amateka yaho arazwi hari icyocyezo mu nzu y’umuturage bocyerezagamo imibiri y’abatutsi bahicirwaga rero twabonye ko ari ngombwa kubumbatira ayo mateka tuhashyira ikimenyetso n’ubusitani bwo kumenyesha abantu ibyahaberaga mu gihe cya Jenoside yakorewe Abatutsi mu w’1994.”

Ubuyobozi bw’akarere ka Rusizi bwatangaje ko inyigo yabyo n’ingengo y’imari byarangiye ,igisigaye ari ukubishyira mu bikorwa.