Rusizi:Inzu 1126 nizo zicyenewe kubakirwa abarokotse Jenoside yakorewe Abatutsi mu w’1994

Ubuyobozi bw’akarere ka Rusizi buherutse gutangaza ko bafite umukoro wo kubaka inzu zigera ku 1126 z’abarokotse Jenoside yakorewe Abatutsi mu w’1994.

Ibi biherutse gutangazwa n’Umuyobozi w’Akarere ka Rusizi Sindayiheba Phanuel mu kiganiro aherutse kugirana n’itangazamakuru ku bikorwa bijyanye no kwibuka ku nshuro ya 32 ,Jenoside Yakorewe Abatutsi mu w’1994.

Uyu muyobozi yavuze ko akarere gahangayikishijwe n’imiryango yabarokotse Jenoside yakorewe Abatutsi baba mu mazu ashaje bityo ko bagomba guhuza imbaraga kugirango asananurwe.

Ati:”Amazu agera ku 1126 y’abarokotse jenoside yakorewe Abatutsi mu w’1994 yarashaje kuko yubatswe mu gihe cyo mu myaka 1995,1996,1997,1998 ,yubatswe mu buryo butagezweho bityo ko atasanurwa ahubwo tugiye guhuza imbaraga kugirango yubakwe bundi bushya.”

Sindayiheba Phanuel, Umuyobozi w’Akarere ka Rusizi yabwiye itangazamakuru ko ayo mazu azubakwa n’akarere ka Rusizi ku bufatanye na Ministeri y’ubumwe bw’abanyarwanda n’Inshingano Mboneragihugu n’abandi bafatanyabikorwa akaza yitezweho gutuza neza abarokotse Jenoside yakorewe Abatutsi batuye mu mazu ashaje.

Muri izo nzu hari izatangiye kubakwa mu bice bitandukanye by’akarere ka Rusizi nko mu Gatsiro,Mashesha ,Murangi ,Munyove n’ahandi mu rwego rwo gushakira abarokotse Jenoside yakorewe Abatutsi aho baba batekanye.